धनगढी । धनगढीमा लागुऔषध खैरो हेरोइनसहित पाँच जना पक्राउ परेका छन् । बिहीबार बेलुका धनगढी उपमहानगरपालिका-२ त्रिनगर भन्सार चोकबाट धनगढी-१३ बस्ने २४ वर्षका शंकर राना ४ ग्राम ८८० मिलिग्राम लागुऔषध खैरो हेरोइन जस्तो देखिने धुलो पदार्थसहित पक्राउ परेका हुन् । उनलाई लागुऔषध नियन्त्रण ब्युरो शाखा धनगढी र प्रहरी चौकी त्रिनगर, कैलालीबाट संयुक्त रुपमा खटिएको टोलीले नियन्त्रणमा लिएको हो । 

यसैगरी, धनगढी-२ त्रिनगर ब्यारेल नजिकबाट सुर्खेतको वीरेन्द्रनगर नगरपालिका-१४ घर भई कैलालीको गोदावरी नगरपालिका-१ अत्तरियामा कपडा पसल गरी बसेका ३० वर्षका अवतार हुसेनले चलाएको से ७ प १५५ नम्बरको मोटरसाइकललाई चेकजाँच गर्दा ९ ग्राम ६७० मिलिग्राम खैरो हेरोइन जस्तो पदार्थ बरामद गरी उनलाई पक्राउ गरिएको प्रहरीले बताएको छ । 

धनगढी-७ मनेहराबाट सोही ठाउँ बस्ने ३५ वर्षका राज कुमार रानालाई ९० मिलिग्राम, धगढी-८ बस्ने ४२ वर्षका भक्त रानालाई २ ग्राम २३० मिलिग्राम र धनगढी-१३ कैलालीगाउँबाट सोही ठाउँ बस्ने २४ वर्षका सन्तोष रानालाई १२० मिलिग्राम खैरो हेरोइन जस्तो देखिने धुलो पदार्थसहित जिल्ला प्रहरी कार्यालय कैलालीबाट खटिएको प्रहरी टोलीले नियन्त्रणमा लिएको जनाएको छ ।

पक्राउ परेका पाँचै जनमाथि थप अनुसन्धान भइरहेको प्रहरीले बताएको छ ।