धनगढी । कैलालीमा अटो र मोटरसाइकल ठोक्किँदा ८ जना घाइते भएका छन् । जिल्लाको बर्दगोरिया गाउँपालिका–२ भित्री सडकखण्डमा भे२स ५६६१ नम्बरको अटो र सुपप्र०१००९ प ४६५३ नम्बरको मोटरसाइकल शनिबार बेलुका आपसमा ठोक्किएका हुन् । 

दुर्घटनामा अटो चालक बर्दगोरिया–२ कै २२ वर्षीय पुष्कर विक, मोटरसाइकल चालक कैलारी गाउँपालिका-२ का ३० वर्षीय राम चौधरीसहित ८ जना घाइते भएका जिल्ला प्रहरी कार्यालय कैलालीले बताएको छ । अटोमा ६ जना र मोटरसाइकलमा दुई जना सवार रहेका बताइएको छ ।

दुर्घटनामा अटोमा सवार बर्दगोरिया-२ की ६ वर्षीया आरती आलेमगर गम्भीर घाइते भएकी प्रहरीले बताएको छ । उनको सेती प्रादेशिक अस्पतालमा उपचार भइरहेको छ । अरु सामान्य घाइते भएका प्रहरीले जनाएको छ ।