एजेन्सी । अमेरिकामा यात्रु बोकेको विमान आकाशमै हेलिकोप्टरसँग ठोक्किएको छ । स्थानीय समयअनुसार राति ९ बजे रेगन वाशिङ्टन राष्ट्रिय विमानस्थल नजिकै पोटोमाक नदीमाथिको आकाशमा दुर्घटना भएको सङ्घीय उड्डयन प्रशासनलाई उदधृत गर्दै बीबीसीले जनाएको छ । 

घटनापछि रेगन विमानस्थलले सबै उडान तत्कालका लागि बन्द गरेको छ । विमानस्थलको धावनमार्गतिर जाँदै गरेको अवस्थामा विमान अमेरिकी सेनाको हेलिकोप्टरसँग ठोक्किएको हो ।
आपतकालीन उद्धार टोलीले १८ वटा शव फेला परेको जनाइएको छ । विमानमा ६० यात्री र चालक दलका चार सदस्य सवार थिए भने सेनाको हेलिकोप्टरमा तीन जना सवार रहेको जनाइएको छ । 

सेनाको हेलिकोप्टर प्रशिक्षण उडानमा रहेको र विमान अवतरणको क्रममा रहँदा आपसमा ठोक्किएका थिए । विमानको टुक्रा नदीमा फेला परेको बताइएको छ । हेलिकोप्टरको भग्नावशेष पनि नदी नजिकै फेला परेको अधिकारीहरूले जनाएका छन् ।