धनगढी । सुदूरपश्चिम प्रदेशसभा बैठक सञ्चालनका लागि दलहरूबिच छलफल भएको छ । मुख्यमन्त्री तथा मन्त्रीपरिषद् कार्यालय र सभामुखको कार्यालयमा छुट्टैछुट्टै भएको छलफलमा दलहरू सहमतिनजिक पुगेका छन् । 

मुख्यमन्त्री कमलबहादुर शाहले मुख्यमन्त्री तथा मन्त्रीपरिषद् कार्यालयमा बोलाएको सर्वदलीय बैठकमा प्रदेश सदन खुलाउने विषयमा छलफल भएको हो । छलफलमा प्रदेशसभा बैठक चाँडै सुचारु गर्नेबारे दलहरू लगभग सहमत पुगेको प्रतिपक्षी दल नेकपा एकीकृत समाजवादीका प्रमुख सचेतक नरेशकुमार शाहीले जानकारी दिए । 

प्रदेश सरकारले फजुल खर्च कटौती गर्नुपर्नेलगायतका माग राखेर प्रतिपक्षी दल नेकपा माओवादी केन्द्र, एकीकृत समाजवादी, राप्रपा र स्वतन्त्रले प्रदेशसभा बैठक अवरुद्ध गर्दै आएका छन् । 

सभामुख भीमबहादुर भण्डारीले पनि कार्यव्यवस्था तथा परामर्श समितिको बैठकमा बोलाएर गतिरोध अन्त्यका लागि सत्तापक्ष र प्रतिपक्षसँग छलफल गरेका छन् । कुनै पनि नाममा सदनलाई अनिर्णयको बन्दी बनाउन नहुने र चाँडै सुचारु गर्नुपर्ने विषयमा समितिको बैठकमा छलफल भएको थियो ।