धनगढी । कैलालीको अत्तरियामा मृत फेला परेका ३५ वर्षीय जगदीश कैनीको हत्या आरोपमा पक्राउ परेकाले अभियोग स्वीकार गरेका छन् । 
हत्या अभियोगमा दुई जना पुुरुष र एक महिला पक्राउ परेका थिए । उनीहरुमध्ये शारीरिक अपांगता भएका पुुरुष र महिला एकअर्कालाई श्रीमान श्रीमतीका रुपमा चिनाउने गर्दै आएका थिए । प्रहरीले संकलन गरेको सीसीटीभी फुुटेजमा उक्त राति पक्राउ परेकामध्ये ती पुरुष मन्दिरभित्र प्रवेश गरेर केही समयमा फर्किएको देखिन्छ ।

उनैले प्रहरीलाई कैनीको हत्या आफैँले गरेको बयान दिएका छन् । उनले आफ्नो श्रीमतीलाई कैनीले जिस्काउने गरेको र आफूलाई अपांग देखेर होच्याउने गरेको बताउँदै ढुंगा प्रहार गरेर हत्या गरेको बयान दिएका छन् । 

हत्या गरिएको अवस्थामा मृत फेला परेका कैनी सडक पेटीमा बस्दै आएका व्यक्ति भएको पाइएको छ । डडेल्धुराको अमरगढी नगरपालिका–७ स्थायी घर भएका कैनी केही वर्षदेखि सडक पेटीमै बस्दै आएको खुलेको प्रहरीले जनाएको छ ।

राति अत्तरियाकै दुर्गा मन्दिर परिसरमा सुुतेकै अवस्थामा टाउकोमा ढुंगा प्रहार गरेर कैनीको हत्या भएको प्रहरी अधिकारी बताउँछन् ।