धनगढी । एमालेको ११औं महाधिवेशनका लागि प्रतिनिधि छनोट अन्तिम चरणमा छ । कैलालीमा पनि पाँच वटै निर्वाचन क्षेत्रमा प्रतिनिधि छनोट गरिएको छ । 

सुदूरपश्चिम प्रदेशमै चाँसोको साथ हेरिएको कैलाली निर्वाचन क्षेत्र नम्बर ५ मा सहमति नहुँदा निर्वाचनमार्फत प्रतिनिधि छनोट गरिएको छ । जहाँ जिल्ला अध्यक्ष यज्ञराज ढुंगाना र पोलिटव्यूरो सदस्यसमेत रहेका जिल्ला इञ्चार्ज नारदमुनि राना प्यानलसहित चुनावी मैदानमा थिए । ढुंगानालाई पूर्वमन्त्री दामोदर भण्डारीको साथ थियो भने रानालाई सुदूरपश्चिम इञ्चार्जसमेत रहेका केन्द्रीय सचिव लेखराज भट्ट र नेता कर्णबहादुर थापाको साथ थियो । केन्द्रमा सवै अध्यक्ष केपी शर्मा ओली पक्षधर हुन् । 

निर्वाचनमा भट्ट र थापाबाट साथ पाएको नारदमुनिको टिम भने स्वीप भएको छ । ढुंगाना टिमले बाजी मारेको छ । निर्वाचन कमिटीले सार्वजनिक गरेको परिणामअनुसार खुलामा धर्मराज पाठक, नेपालु चौधरी, विष्णुकुमार चन्द र यज्ञराज ढुंगाना विजयी भएका छन् । महिलामा अम्बिका बिष्ट र रुकमणी देवकोटा तथा युवामा तीर्थराज भट्टराई विजयी भएका छन् । 

राना टिमका सबै उम्मेदवार पारजित भएका छन् । धनगढीका उपमेयर कन्दकलाकुमारी राना पनि महाधिवेशन प्रतिनिधिको निर्वाचन पराजित भएकी छिन् । महिला क्लस्टरमा चार उम्मेदवारमध्ये उनी सबैभन्दा पुछारमा छिन् ।