धनगढी । एमालेको ११औं महाधिवेशनका लागि कैलालीको निर्वाचन क्षेत्र नम्बर ४ मा प्रतिनिधि छनोट गरिएको छ । सहमति जुट्न नसक्दा निर्वाचन प्रक्रियामार्फत छ जना प्रतिनिधि छनोट गरिएको हो । 

एमाले सुदूरपश्चिमका इञ्चार्जसमेत रहेका सचिव लेखराज भट्ट र नेता दामोदर भण्डारी पक्षधर टिम बनएर निर्वाचनमा होमिएका थिए । लेखराज पक्षका उम्मेदवारलाई नेता कर्ण थापा र कैलाली इञ्चार्ज नारदमुनि रानाले पनि साथ दिएका थिए । दामोदरलाई भने जिल्ला अध्यक्ष यज्ञराज ढुंगानाको साथ थियो । 

प्रतिनिधि छनोटको निर्वाचनमा लेखराज–कर्ण र नारदमुनि पक्षका उम्मेदवार विजयी हुँदा दामोदर पक्षका उम्मेदवार भने पराजित भएका छन् । खुलातर्फ चक्रबहादुर बोहरा, नरबहादुर तामाङ र भीमबहादुर देउवा प्रतिनिधि निर्वाचित भएका हुन् । महिलामा रत्ना कुँवर जोशी र शान्तिदेवी सिंह तथा युवामा सुद्धिराम चौधरी प्रतिनिधिमा निर्वाचित भएका छन् । 

पूर्वमन्त्रीसमेत रहेका भण्डारीका विश्वास पात्र आनन्दप्रसाद भट्ट पनि चुनाव हारेका छन् । उनी खुला प्रतिनिधिमा उम्मेदवार बनेका थिए ।