धगनढी । कञ्चनपुर कारागारमा दुई समूहबीच भएको झडपको अनुसन्धान गर्न छानबिन समिति बनाइएको छ । प्रमुख जिल्ला अधिकारी लक्ष्मण ढकालले तीन सदस्यीय छानबिन समिति बनाएका हुन् । 

सहायक प्रमुख जिल्ला अधिकारी मोहनचन्द्र जोशीको संयोजकत्वमा छानबिन समिति गठन गरिएको प्रमुख जिल्ला अधिकारी ढकालले बताए । ‘समितिमा जिल्ला प्रहरी कार्यालयका प्रहरी नायब उपरीक्षक सागर बोहरा र जिल्ला प्रशासन कार्यालयका प्रशासकीय अधिकृत धर्मराज उपाध्याय सदस्य छन्,’ उनले भने । छानबिन समितिलाई सात दिनको समय दिइएको प्रमुख जिल्ला अधिकारी ढकालले बताए ।

शुक्रबार कञ्चनपुर काराकारमा रहेका कैदीबन्दीबीच झडप हुँदा ८ जना घाइते भएका थिए । कारागारमा रहेका नाइके र चौकीदारसंग अन्य कैदीबन्दीको झडप भएको थियो । नाइके र चौकीदार छनोट प्रक्रिया पारदर्शी नभएको तथा उनीहरुले कैदीबन्दीलाई गर्ने व्यवहारमा समानता नभएको आरोप कैदीबन्दीको छ ।