धनगढी । धनगढीमा बुधबारबाट राष्ट्रपति रनिङ्ग शिल्ड प्रतियोगिता सुरु हुँदैछ । भोलि पुस २४ गतेदेखि सुरु हुने १५औँ राष्ट्रपति रनिङ्ग शिल्ड प्रतियोगिता धनगढी रङ्गशालामा हुने उपमहानगरपालिकाले जनाएको छ । 

मङ्गलबार पत्रकार सम्मेलनको आयोजना गर्दै नगर उपप्रमुख कन्दकला कुमारी रानाले प्रतियोगिताको तयारी अन्तिम चरणमा पुगेको र सङ्घीय सरकारको नियमित खेलकुद कार्यक्रमसँगै नगरले पनि खेलकुद क्षेत्रको विकासका लागि कार्यक्रमहरू अघि बढाइरहेको बताइन् । 

उनका अनुसार प्रतियोगितामा नगरभरिका २६ सामुदायिक र १५ संस्थागत गरी ४१ वटा विद्यालयहरूको सहभागिता रहनेछ । राष्ट्रपति रनिङ्ग शिल्ड प्रतियोगिता सञ्चालन गर्न सङ्घीय सशर्त अनुदानतर्फ बजेट नरहे पनि उपमहानगरले आफ्नै आन्तरिक तर्फबाट ८ लाख विनियोजन गरेर कार्यक्रम सञ्चालन गरिरहेको बताइएको छ ।