धनगढी । डडेल्धुरादेखि बैतडीको मेलौली जोड्ने उग्रतारा–मैलौली सडकखण्ड निर्माण सुरु भएको चार दशक पुगेको छ । डडेल्धुराको अजयमेरु गाउँपालिकाका सबै वडा जोड्दै बैतडीको दुर्गममा रहेको तल्लो स्वराड पुग्ने सबैभन्दा छोटो दुरीको उक्त सडक लोकेन्द्रबहादुर चन्द प्रधानमन्त्री हुँदा ०४२ सालमा निर्माण सुरु भएको थियो । 

सडक निर्माण सुरु भएको चार दशक पुग्नै लाग्दा अहिलेसम्म डडेल्धुरा खण्डमा १८ किलोमिटर मात्रै कालोपत्रे भएको छ । तर, सडक कालोपत्रे भए पनि पुल नहुँदा प्रत्येक बर्सातमा सास्ती हुने गरेको छ । उग्रतारा–मैलौली सडकको बसना गाडमा पुल निर्माण नभएको हो । बसना गाडमा पुल निर्माणका लागि गत वर्ष पूर्वाधार विकास कार्यालय डडेल्धुरासंग एक करोड बजेट थियो । थप बजेटको व्यवस्थापन गरेर बहुवर्षीय ठेक्कामा जाने योजना थियो । 

स्रोत सहमतिका लागि फाइल अर्थ मन्त्रालयसम्म पुगाइएकोमा अर्थले स्रोत सहमति नदिएपछि पुल निर्माणको योजना अगाडि बढ्न सकेन । यसवर्ष पनि पूर्वाधार विकास कार्यालयले स्रोत सहमतिका लागि फाइल आर्थिक मामिला मन्त्रालयमा पुगाएको छ । तर, अहिलेसम्म सहमति प्राप्त गरेको छ । 

यसैबीच अजयमेरु गाउँपालिका– २ का वडाध्यक्ष शिवराज भट्टले यो वर्ष पनि पुल निर्माणको प्रक्रिया सुरु नभए आफ्नो वडामा बहिष्कार गर्ने चेतावनी दिएका छन् । ‘बसाना गाडको पुलको बहुबर्षे ठेक्काको लागि प्रदेश सरकारको अर्थ मन्त्रालयमा फाइल पुगेको महिना दिनभन्दा बढी भइसकेको छ,’ वडाध्यक्ष भट्टले भनेका छन्, ‘स्वीकृतको कुनै अत्तोपत्तो छैन । यो वर्ष पनि निरासता आउने हो भने खबरदार माननिय खगराज भट्टज्यू, माननिय डा. तारा जोशीज्यू, माननिय सरस्वती खडकाज्यू, माननिय गीता मालज्यू र आदरणीय माननिय शेरबहादुर देउबाज्यू र डा. आरजु राणाज्यू, अजयमेरु गाउँपालिका–२ चमडामा बसना जाड तरेर आउने कुचेस्टा नगर्नुहोला । यहाँहरु सबैलाई बहिष्कार गरिने छ ।’ वडाका सबै बासिन्दाबाट चन्दा संकलन गरेर प्रदेश र प्रतिनिधिसभाका सांसदलाई खाजा खर्च पठाउने पनि वडाध्यक्ष भट्टले बताउका छन् । 

सोही सडकखण्डअन्तर्गत नौलाकोट गाडमा भने पुल बनेको छ । डडेल्धुराको उग्रतारा मन्दिरदेखि ९६ किलोमिटर लामो दुरीको सडक निर्माण गर्ने कार्य भने जारी छ । डडेल्धुरा खण्डमा अहिलेसम्म उग्रतारा मन्दिरदेखि चमडासम्म सडक कालोपत्रे भइसकेको छ भने बैतडी खण्डमा पनि मेलौलीदेखि सुर्नाया नदीको माथिसम्म कालोपत्रे भएको छ ।