धनगढी । कैलालीको सिमली क्षेत्रको जंगलमा हिप्पी जस्तै देखिने डेढ सय बढी विदेशी नागरिक बसिरहेको पाइएको छ । पर्यटन भिसामा नेपाल आएका अमेरिका, चिनसहित विभिन्न युरोपेली मुलुकका नागरिकको दुई सातादेखि घोडाघोडी-९ को सिमली जंगलमा बसिरहेका हुन् ।

रेन्बो फेमली ग्यादरिङ नाम दिएर समूहमा आएका उनीहरुले जंगलमा बस्न कुनै पनि निकायबाट अनुमति लिएका छैनन् । अर्धनग्न अवस्थामा रहेका उनीहरु हेर्दा हिप्पी जस्तै देखिन्छन् ।

जंगलमा बसेर अस्वाभाविक गतिविधि गर्दै आएको गुनासोपछि बिहीबार कैलालीका प्रमुख जिल्ला अधिकारी गोगन हमाल, प्रहरी प्रमुख पदम बिष्टसहितको टोली सिमली पुगेको थियो । कुनै पनि निकायबाट जंगलमा बस्ने अनुमति नलिएका कारण उनीहरूलाई २४ घण्टाभित्र ठाउँ खाली गर्न निर्देशन दिइएको प्रमुख जिल्ला अधिकारी हमालले बताए ।

‘जङ्गलमा विदेशी नागरिक बस्दै आएको र उनीहरुले अस्वाभाविक गतिविधि गरिरहेको गुनासो आएपछि त्यहाँ पुगेका थियौँ,’ हमालले भने, ‘सबै जनालाई २४ घण्टाभित्र ठाउँ खाली गर्न भनेका छौं ।’

प्रमुख जिल्ला अधिकारीसंग कुराकानीका क्रममा विदेशी नागरिकली आफूहरु प्रकृतिमा रमाउने नेचर लभर भएको र विभिन्न देशमा पुगेर जंगलमा बस्ने गरेको बताएका थिए ।

सीडिओ हमालका अनुसार विदेशी नागरिकले जंगलमै खाना पकाउने गरेका छन् । उनीहरूसंग बालबालिका पनि छन् ।