धनगढी । नेकपा एमालेबाट निष्कासित पूर्वउपाध्यक्ष भीम रावलले मातृभूमि जागरण अभियान सञ्चालन गर्ने भएका छन् । बुधबार पत्रकार सम्मेलन गर्दै उनले मातृभूमि जागरण अभियान सञ्चालन गर्ने बताएका हुन् । 

देश र जनताको हकहित रक्षा गर्नका लागि उक्त अभियान सञ्चालन गर्ने रावलले बताए । उनका अनुसार मातृभूमि जागरण अभियान राष्ट्रव्यापी अभियान चलाइने छ । सो क्रममा भ्रष्टाचार र कुशासनका विरुद्ध जनतालाई जागरुक बनाइने छ ।

रावलले आफू पार्टी खोल्नबाट नडराएको पनि दाबी गरेका छन् ।  ‘अहिलेको मातृभूमि जागरण अभियान, भविष्यको सशक्त देशभक्तिपूर्ण संगठनको आधार हुनेछ,’ उनले पत्रकार सम्मेलनमा भने । 

नेता रावलले आफूमाथि पूर्वाग्रह राखेर कारबाही गरिएको पनि आरोप बताए । चितवनमा सम्पन्न महाधिवेशनमा अध्यक्षमा केपी ओलीसँग प्रतिस्पर्धा गरेकाले आफूमाथि कारबाही भएको भन्दै रावलले ओलीले पनि किन झलनाथ खनाल र माधव नेपालसँग अध्यक्षमा प्रतिस्पर्धा किन गरेको भन्दै प्रश्न गरे ।