धनगढी । नेकपा एमालेबाट निष्कासित पूर्वउपाध्यक्ष भीम रावल र एमालेका स्थायी कमिटी सदस्य कर्ण थापाको एकसाथ धनगढी आगमन भएको छ । शुक्रबार बिहान श्रीएयरको जहाजमा एउटै सिटमा बसेर रावल र थापा धनगढी पुगेका हुन् ।

रावल एमालेबाट निष्कासित भएपछि नयाँ पार्टीको अभियानमा छन् । थापा रावललाई कारबाही गर्नु नहुने पक्षमा थिए ।

धनगढी विमानस्थलमा रावलको स्वागतका लागि उनका समर्थक पुगेका थिए । थापा भने एउटा सरकारी गाडीमा विमानस्थलबाट धनगढीतर्फ लागेका थिए ।

उनीहरु सँगैसँगै यात्रा गर्नुको पछाडिलाई महत्पूर्ण ढंगले हेरिएको छ भने कतिपयले संयोगको यात्रा ठानेका छन् । नेता रावल एमालेले पार्टीबाट निष्कासित गरेपछि पहिलोपटक गृहप्रदेश सुदूरपश्चिम यात्रामा निस्केका हुन् ।

 रावलको स्वागतका क्रममा प्रधानमन्त्री तथा एमाले अध्यक्ष केपी शर्मा ओलीविरुद्ध नारावाजीसमेत गरेका थिए ।