काठमाडौँ । टिभी श्रृंखलाका चर्चित कलाकार सागर लम्साल ‘बले’ हिरो बन्ने भएका छन् । उनी फिल्म ‘डल्लेले इन्ट्री मार्यो’मा हिरोको रूपमा देखिने भएका हुन् ।  

३५ लाख रुपैयाँ पारिश्रमिकमा राजु गिरीले निर्देशन गर्ने फिल्ममा उनी अनुबन्धित भएको जनाइएको छ । फिल्ममा उनी डल्ले नामक शीर्ष भूमिकामा देखिने निर्देशक गिरीले बताए । उनले पात्रमा फिट, कुशल अभिनय र बजारको मागलाई हेरेर बलेलाई अनुबन्धित गरिएको बताएका छन् ।

‘लोफर’, ‘हैरान’ लगायतका केही फिल्ममा सानोतिनो भूमिका र थुप्रै म्युजिक भिडियोमा अभिनय गरेका सागर १४ फागुनदेखि प्रदर्शनमा आउने फिल्म ‘लाज शरणम’ मा पनि देखिनेछन् । हास्य श्रृखला ‘सक्किगो नि’मा समेत उनी व्यस्त छन् ।

लक्ष्मण सुवेदीको स्क्रिप्ट लेखन रहेको फिल्मको छायांकन फागुन अन्तिमबाट गरिनेछ । सावित्रा चिलुवाल, निर्मता बस्नेत, आशिष र आदर्श बस्नेत निर्माता रहेको फिल्मका अन्य कलाकार तथा प्राविधिक छनौटमा छन् । फिल्म सोसियल कमेडी जनरामा बन्ने निर्माताले जनाएका छन् ।