धनगढी । अछाममा छाउ बार्न त्रिपालमुनि सुतेकी महिलाको ढुङ्गा लागेर मृत्यु भएको छ । संगै सुतेकी बालिकाको पनि ज्यान गएको छ । जिल्लाको पञ्चदेवल विनायक नगरपालिका–८ सेलापानीमा आज बिहान साढे ५ बजे खेतबारीमा त्रिपाल टाँगी सुतिरहेको अवस्थामा माथिबाट खसेको ढुङ्गा लाग्दा दुबै जनाको मृत्यु भएको हो ।

गोरे भण्डारीकी ७ वर्षीया छोरी कविता भण्डारी र ३५ वर्षीया निम खनालको घटनास्थलमै मृत्यु  भएको जिल्ला प्रहरी कार्यालय अछामका प्रमुख प्रहरी नायब उपरीक्षक ओमप्रकाश खनालले जानकारी दिए ।

डीएसपी खनालका अनुसार मृतक कविताकी ३६ वर्षीया आमा रत्ना भण्डारी गम्भीर घाइते भएकी छन् । उनको टाउकोमा चोट लागेर अवस्था गम्भीर रहेकाले उपचारका लागि स्वास्थ्य चौकी बारला पठाइएको प्रहरीले जानकारी दिएको छ ।

रत्ना र निम महिनवारी बार्न त्रिपालमुनि सुतेका थिए भने रत्नाकी छोरी पनि संगै सुतेकी थिइन् । घटनास्थलमा आवश्यक अनुसन्धान तथा कानुनी प्रक्रियाअगाडि बढाउन प्रहरी निरीक्षक टेकबहादुर देउवाको कमाण्डमा प्रहरी टोली खटिएको प्रहरीले जनाएको छ ।