धनगढी । कञ्चनपुरमा ७७ वर्षीय वृद्ध चरेससहित पक्राउ परेका छन् । भीमदत्त नगरपालिका-९ खल्ला बस्ने ७७ वर्षका डबल कठायत ७९.५० ग्राम लागुऔषध चरेस जस्तो देखिने कालो पदार्थसहित बिहीबार पक्राउ परेका हुन् । 

लागुऔषध चरेस बिक्री वितरण भइरहेको भन्ने गोप्य सूचनाको आधारमा उनको घर खानतलासी गर्दा सो मात्रामा लागुऔषध फेला पारेको प्रहरीले बताएको छ । उनलाई इलाका प्रहरी कार्यालय व्रह्मदेव, कञ्चनपुरबाट खटिएको टोलीले नियन्त्रणमा लिएको र थप अनुसन्धान भइरहेको जनाएको छ ।  

हिजो नै भीमदत्त-११ गड्डाचौकीबाट भीमदत्त-१८ बस्ने २१ वर्षको मोहन बस्नेतलाई ७.६५ ग्राम लागुऔषध खैरो हेरोइन जस्तो देखिने धुलो पदार्थसहित इलाका प्रहरी कार्यालय गड्डाचौकीको टोलीले नियन्त्रणमा लिएको बताएको छ ।