छ लेन सडकको ढलबाट धनगढीको डुवानको समस्या समाधान नभएपछि १३ करोड लगानीमा अर्को ढल बनाउन ठेक्का लगाइएको छ ।

धनगढी । बर्सातको पानी निकासका लागि कैलालीको धनगढीमा दोहोरो खर्च गर्न थालिएको छ । छ लेन सडकमा ढलकै छेउमा अर्को ढल निर्माण भइरहेको छ । छ लेन सडकको ढल निर्माण गर्दा डुबानको सम्भावित जाेखिमलाई ख्याल नगरेको कारण करोडौं खर्च गरेर अहिले फेरि ढलकै छेउमा अर्को ढल निर्माण गर्नु परेको हाे ।

धनगढी उपमहानगरपालिकाका चार वटा वडाको डुबानको समस्या छ लेन सडकको ढलले समाधान नगरेपछि संघीय आयोजना कार्यान्वयन इकाइले मोहनापुल–अत्तरिया छ लेन सडकको दुबैतर्फको ढलकै छेउमा अर्को ढल निर्माण गरिरहेको छ । सडकको ढलले सडकको मात्रै पानी निकास गर्ने गरी निर्माण गरिएपछि दुबैतर्फको ढलको छेउमा अर्को ढल बनाएर वर्षौदेखि डुबान पर्दै आएका धनगढीका वडा नं. २, ३, ४ र १३ मा जम्ने बर्खाको पानीको निकास गर्ने व्यवस्था गरिरहेको इकाइले जनाएको छ ।

मोहना पुलदेखि गेटासम्म छ लेन सडकको दुबैतर्फ ढल निर्माण गर्ने गरी डीपिआर बनाइएको इकाइका इञ्जिनियर पुष्पराज भट्टले बताए । उनले यो वर्ष सडकको पूर्वी किनाराको ढल निर्माणका लागि तीन करोड ८० लाख र पश्चिमतर्फको ढल निर्माणका लागि एक करोड ५२ लाख रुपैयाँ विनियोजन भएकोले मोहना पुलदेखि धनगढी चौराहासम्म ढल निर्माणको ठेक्का लगाई निर्माण गर्न थालिएको बताए ।

इकाइले गत माघ ९ गते ढल निर्माण कार्य शिलान्यास गरेको थियो । दुई महिनामा करिब अढाई सय मिटर ढल निर्माण भइसकेको इञ्जिनियर भट्टले बताए । उनका अनुसार पश्चिमतर्फ एक हजार चार सय ५० मिटर ढल निर्माण गर्न सात करोड ४४ लाख ७९ हजारमा एमबी शुभलक्ष्मी आदर्श जेभीलाई र पूर्वतर्फ एक हजार तीन सय ६५ मिटर ढल निर्माण गर्न छ करोड पाँच लाखमा सनराइज चन्द्र विकाश मष्टा जेभीसँग सम्झौता भएको छ । उनका अनुसार ३० महिनाको अवधिमा निर्माण सम्पन्न गर्ने गरी ठेक्का लगाइएको भए पनि सम्झौता अवधिभन्दा अगाडि नै निर्माण कार्य सम्पन्न गर्ने गरी निर्माण व्यवसायीहरुले काम गरिरहेको बताए ।

छ लेन सडकको दुबैतर्फ चौराहासम्म नाली बनेपछि वडा नं. २, ३ र ४ को डुबानको समस्या समाधान हुने प्राविधिकहरुको दावी छ । इञ्जिनियर भट्टले बर्खामा ती वडामा जम्मा हुने पानी ढलमार्फत् मोहना नदीमा फाल्ने गरी गहिरो नाली निर्माण भइरहेको बताए ।

सडक, भवन लगायतका संरचना निर्माणले गर्दा धेरै पहिलेदेखि धनगढीका ती वडाहरु डुबान पर्दै आएका छन् । छ लेन सडकको ढलबाट पनि डुबान समस्या समाधान नहुने भएकोले अर्को ढल निर्माण गर्नुपरेको इञ्जिनियर भट्टले बताए । ‘सडक अग्लो बनेको छ, सडकको नाली पनि हाइटमै बनेको छ,’ उनले भने, ‘सडकको नाली बनाउँदा सडककै पानी मात्र काट्ने उद्देश्यले निर्माण गरिने भएकोले यसले ढलको काम गर्दैन ।’

लामो समय सडक निर्माणको क्षेत्रमा काम गरेका सेवा निवृत्त इञ्जिनियर महेन्द्र पन्तले विभागहरुबीच समन्वय नहुँदा एकै ठाउँमा २/२ वटा ढल निर्माण गर्नुपर्ने अवस्था आएको बताए । ‘सडक बनाउँदा नै बस्तीको पानीसमेत निकास गर्ने गरी सडकको ढलको डिजाइन गरिएको भए यस्तो अवस्था आउने थिएन,’ उनले भने, ‘डुबानको समस्या भएको ठाउँमा सडकको ढल निर्माण गर्दा बस्तीको पानीसमेत निकास गर्ने गरी डिजाइन गर्नुपर्ने नीति समेत बनाउन आवश्यक छ ।’

एउटा विभाग अन्तरगतको कार्यालयले काम गर्दा अर्को विभागको कार्यालयसँग समन्वय नगरी काम गर्दाको परिणाम छ लेनमा मात्रै नभई खानेपानी, सडक, ढल, टेलिफोन, विद्युत लगायत पूर्वाधारको काममा समस्या आउने गरेको इञ्जिनियर पन्तले बताए । ‘पहिले नै दुबै निकायबीच समन्वय भएको भए डुवानको समस्या समाधान गर्नमासमेत उपयोग हुने गरी सडकको ढल निर्माण गर्न सकिन्थ्यो,’ उनले भने, ‘यस्तो गर्दा थोरै मात्रै लागत बृद्धि हुन्थ्यो । दोहोरो ढल निर्माण गर्दा लागत पनि दोब्बर हुनुका साथै ठाउँ ठाउँमा बनिसकेको संरचना भत्काउनुपर्ने अवस्था आउछ ।’

भौतिक पूर्वाधार तथा यातायात मन्त्रालय मातहतको सडक विभागले आयोजना कार्यालय खडा गरि धनगढीमा छ लेन सडक निर्माण गरेको थियो । सहरी विकास मन्त्रालय अन्तरगतको संघीय आयोजना कार्यान्वयन इकाइले बस्तीको पानी निकासका लागि छ लेन सडकमा सर्भिस लेन बनाउन छुट्याएको भागमा अहिले ढल निर्माण भइरहेको छ । इकाइले ढल निर्माण गर्दा सर्भिस लेन भने निर्माण गर्ने छैन । ढल निर्माणपछि सामान्य पटान मात्रै गरिने इकाइले जनाएको छ । ढल निर्माण गर्दा सडक क्रसिङ पर्ने ठाउँमा बनिसकेको सडक समेत भत्किने भएको छ ।

डुबानको समस्या निराकरणका यसअघि छ लेन सडककै छेउमा प्लास्टिक पाइप पनि विस्तार गरिएको थियो । ढल निर्माण सुरु भएपछि पौने तीन करोडमा विस्तार गरिएका ती पाइप अहिले निकाल्न थालिएको छ ।