धनगढी । बझाङमा जीप दुर्घटना हुँदा चालकको मृत्युु भएको छ । बिहीबार राति जिल्लाको मष्टा गाउँपालिका भातेखोलाबाट रनाडातर्फ जाँदै गरेको सु.प.प्र.०१-००१ ज १३९८ नम्बरको जीप दुर्घटना हुँदा मष्टाकै ४२ वर्षीय धर्म थापाको मृत्यु भएको हो ।

थापा जीप चालक हुन् । राति ९ बजेको समयमा कोटदेवल भन्ने स्थानमा जीप दुर्घटना भएको जिल्ला प्रहरी कार्यालय बझाङले जनाएको छ । जीप अनियन्त्रित भएर सडकबाट एक सय मिटर तल खसेको बताइएको छ । 

बिहीबार राति नै बझाङमा अर्को जीप दुर्घटना हुँदा एकै परिवारका तीनसहित चार जनाको मृत्यु भएको थियो । जिल्लाको तलकोट गाउँपालिकाबाट सदरमुकाम चैनपुर जाने क्रममा तलकोट गाउँपालिका-२ मा से १ ज ८४३ नम्बरको जीप दुर्घटना हुँदा चार जनाको मृत्यु भएको हो । 

जिल्ला प्रहरी कार्यालय बझाङका सूचना अधिकारी प्रहरी निरीक्षक लोकेन्द्रसिंह ठगुन्नाका अनुसार जीप चालक केदारस्यूँ गाउँपालिका-१ रायलका अन्दाजी ३३ वर्षीय शमशेर मल्ल, तलकोट गाउँपालिका-४ की ७२ वर्षीया जौमतीदेवी धामी र उनका छोरा ३६ वर्षीय बम्मबहादुर धामी र धामीकै नातिनी छ वर्षीया बालिका आकृति धामीको मृत्यु भएको हो ।

`तीन जनाको घटनास्थलमै र बालोका धामीको जिल्ला अस्पताल बझाङ लैजाने क्रममा मृत्यु भएको हो,´ इन्सपेक्टर ठगुन्नाले भने ।