धनगढी । कञ्चनपुरमा विङ्गर र मोटरसाइकल ठोक्किँदा चार जना घाइते भएका छन् । जिल्लाको कृष्णपुर नगरपालिका–२ बंकस्थित पूर्वपश्चिम राजमार्गमा सु.प.प्र. ०२–००१ ज ०४१७ नम्बरको विङ्गर र से ४ प १६६१ नम्बरको मोटरसाइकल शनिबार बिहान ठोक्किएका हुन् ।

दुर्घटनामा घाइते हुनेमा मोटरसाइकल चालक कृष्णपुर–२ वाणी शिविर बस्ने पुष्पराज चौधरी, मोटरसाइकल पछाडि सवार ३० वर्षीय सन्तोष चौधरी र ३८ वर्षीय नारदमुनी राना रहेका जिल्ला प्रहरी कार्यालय कञ्चनपुरले बताएको छ । प्रहरीका अनुसार पुष्पराज र सन्तोषको अवस्था गम्भीर रहेको छ। उनीहरूको माया मेट्रो अस्पताल धनगढीमा उपचार भइरहेको छ । नारदमुनीको भने वाणीमै उपचार भइरहेको छ ।

विङ्गरमा सवार कञ्चनपुरको शुक्लाफाँटा नगरपालिका–१० का ८६ वर्षीय जयबहादुर कुँवर पनि घाइते भएका छन् । विङ्गर चालक डडेल्धुराको परशुराम नगरपालिका–२ बस्ने अन्दाजी २६ वर्षीय पदमबहादुर बोहरालाई नियन्त्रणमा लिएको कञ्चनपुर प्रहरीले जनाएको छ ।