सर्लाही । सर्लाहीमा ड्युटीमा खटिएका प्रहरी टोलीमाथि वडाध्यक्षको समूहले आक्रमण गरेको छ । सर्लाहीको रामनगर गाउँपालिका–५ बैजनाथ चोकमा गएराति गाडी जाँच गर्ने क्रममा वडा अध्यक्ष शिवनन्दन यादवसहितका युवाले प्रहरीमाथि आक्रमण गरेका हुन् । 

स्थितिलाई नियन्त्रणमा लिन प्रहरीले पाँच राउन्ड हवाई फायर गरेको छ । राति ९ बजेतिर बैजनाथ चोकमा इलाका प्रहरी कार्यालय गडहिया डुमरियाका प्रहरी निरीक्षक उज्ज्वल कार्कीको कमान्डमा जाँच भइरहेका बेला रामनगर गाउँपालिका–५ का वडाध्यक्ष शिवनन्दन यादवसहितको युवाले प्रहरीमाथि आक्रमण गरेको जिल्ला प्रहरी कार्यालय सर्लाहीका प्रहरी नायब उपरीक्षक (डीएसपी) दीपक श्रेष्ठले जानकारी दिए । 

आक्रमणबाट ट्राफिक प्रहरी हवल्दार शैलेन्द्र राय गम्भीर घाइते भएका र उनको जनकपुरको न्युरो अस्पतालमा उपचार भइरहेको प्रहरीले बताएको छ । आफूले प्रहरीमाथि आक्रमण नगरेको र गाउँका युवाले आक्रमण गर्न थालेपछि छुट्याउन मात्र गएको वडाध्यक्ष यादवको भनाइ छ ।