काठमाडौँ । आगामी माघ २५ गतेबाट प्रदर्शनमा आउने तयारीमा रहेको हरर फिल्म ‘ममी’को दोस्रो चरणको पोस्टर सार्वजनिक गरिएको छ । समर निरौला निर्देशित फिल्मको नयाँ पोस्टरमा प्रियंका कार्कीको लुक्स चित्रण गरिएको छ । 

निलो रंगको नाइट ड्रेसमा रहेकी उनी डर मिश्रित भावमा मुठ्ठी कसेर केही हेरिरहेकी छन् । उनको लुगामा सुकेको रगतको टाटा देखिन्छ र, छेवैमा कालो बिरालो उभिएको छ । पोस्टरमा प्रियंका पछाडिको पुरानो भित्तामा झुण्डिएको रक्ताम्मे पोस्टरमा सुलक्षण भारती, आयुषी ढकाल र जेभिस श्रेष्ठलाई देख्न सकिन्छ । 

हरर फ्यामिली ड्रामा बताइएको फिल्ममा दीया मास्के, समीप निरौला, घनश्याम जोशी र गीत विष्टको पनि अभिनय छ । सो ट्वान्टी फाइभको प्रस्तुतिमा निर्माण भएको फिल्मको पटकथा समर निरौला र पूर्णिमा जोशीले लेखेका हुन् ।