धनगढी । माध्यामिक शिक्षा परीक्षा (एसईई) आजदेखि सुरु भएको छ । परीक्षा बिहान ८ बजेदेखि सुरु भएको हो ।

पहिलो दिन आज अनिवार्य अंग्रेजी तथा संस्कृत वेदविद्याङमतर्फ अनिवार्य संस्कृत रचना र मदरसातर्फ अनिवार्य अरेबिक भाषा विषयको परीक्षा हुँदैछ ।

यसवर्ष सुदूरपश्चिम प्रदेशबाट झन्डै ५९ हजार बढी विद्यार्थी छन् । प्रदेशका नौ जिल्लामा ५८ हजार ९४३ विद्यार्थी रहेका हुन् । 

शिक्षा विकास निर्देशनालय दीपायलका अनुसार ३० हजार ८७७ छात्रा र २८ हजार ६६ छात्र परीक्षार्थी रहेका हुन् । साधारणतर्फ ४३ हजार ९२३, प्राविधिक धारतर्फ दुई हजार ९२ र ग्रेड बृद्धितर्फ १२ हजार ९२८ विद्यार्थी एसइईमा सहभागी भएको निर्देशनालयका महानिर्देशक दुर्गादत्त बिष्टले जानकारी दिए । 

उनका अनुसार एसइईका लागि प्रदेशभर दुई सय २६ परीक्षा केन्द्र निर्धारण गरिएको छ । ५४ परीक्षा केन्द्र रहेको कैलालीमा सबैभन्दा बढी १९ हजार ४८८ विद्यार्थी रहेका छन् ।

यस्तै, ३७ परीक्षा केन्द्र रहेको कञ्चनपुरमा ११ हजार ३०१ विद्यार्थी, २७ परीक्षा केन्द्र रहेको बैतडीमा पाँच हजार ३६२, २६ केन्द्र रहेको अछाममा पाँच हजार २९, १५ केन्द्र रहेको डोटीमा चार हजार ६२ विद्यार्थी, २० केन्द्र रहेको बझाङ्गमा चार हजार ६४४, १७ केन्द्र रहेको दार्चुलामा तीन हजार ३७, १७ केन्द्र रहेको बाजुरामा तीन हजार १८ विद्यार्थी र १३ परीक्षा केन्द्र रहेको डडेल्धुरा दुई हजार ८०२ विद्यार्थी छन् ।