एजेन्सी । दक्षिण भारतका चर्चित अभिनेता अजित कुमार दुर्घटनामा परेका छन् । दुबईमा हालै आगामी रेसिङ च्याम्पियनसिपको अभ्यासको क्रममा उनी गम्भीर कार दुर्घटनामा परेका हुन् ।  

अभिनेताको पोर्श ९९२ कारमा धेरै क्षति पुगेको छ । अजितलाई भने कतै चोट नआएको बताइएको छ । अजित कुमारको रेसिङ टिमका प्रबन्धक तथा चालक फाबियन डुफिक्सले सामाजिक सञ्जाल पोस्टमार्फत अभिनेता आफू ठिक रहेको आश्वासन दिएका थिए । ‘अभ्यासको पहिलो दिन सकियो । अजित सुरक्षित छन्, उनको शरीरमा कतै पनि दर्फराएको चोट छैन,’ इन्स्टाग्रामको पोस्टमा लेखिएको छ । 

तमिल फिल्म उद्योगका चर्चित अभिनेता अजित अनुभवी रेसर पनि हुन् । उनी अहिले दुबईमा हुन लागेको च्याम्पियनसिपको तयारीमा छन् । उनले जनवरी १२ र १३ मा हुन लागेको ‘२४ एच दुबई २०२५ रेस’मा भाग लिँदै छन् ।