कैलाली ।  कैलालीको घोडाघोडी नगरपालिका–९ स्थित सिमली जङ्गलमा बसिरहेका विदेशी नागरिकले जंगल छोड्न अस्विकार गरेका छन् । जिल्ला प्रशासन कार्यालय कैलालीले बिहीबार २४ घण्टाभित्रै जङ्गल छाड्न निर्देशन दिएको थियो । निर्देशनपछि १३५ जनामध्ये ४५ जनाले जङ्गल छाडेर गइसकेका छन् भने अझै ९० जना विदेशी पर्यटक त्यहीँ बसिरहेका छन् ।

निर्देशनको अटेरी गरेपछि प्रहरीको एक टोली उनीहरू बसेको ठाउँमा गएको थियो । तर उनीहरूले ठाउँ नछाडेको इलाका प्रहरी कार्यालय सुखडका प्रमुख प्रहरी निरीक्षक दीर्घ साउदले बताए ।

`केही दिनमै आफैँ हामीहरू गइहाल्छौँ भनेका छन्,´ उनले भने, `फेरि उनीहरूबाट समुदाय वा अरू कुराको त्यस्तो क्षति पनि नदेखिएका कारण हामी उनीहरूलाई त्यहीँ छाडेर फर्केका छौँ ।´

स्थानीयका अनुसार १८ देशका उनीहरू त्यहाँ अर्धनग्न भएर विभिन्न किसिमको गतिविधि गर्दै आएका छन् ।

सन् १९८० र ९० को दशकमा अमेरिकाबाहिर युरोप, ल्याटिन अमेरिका र एसियामा पनि यस्ता जमघट हुन थालेको बताइन्छ । रेन्बो ग्यादरिङको उद्देश्य स्वतन्त्र, नियमविहीन, पैसारहित र समुदायमैत्री जीवनशैली अपनाउनु रहेको बताइन्छ ।